თამარ ქალდანი კამპანია „ეს შენ გეხებას“ წევრებს შეხვდა
2016-05-19 13:51:19
2016 წლის 19 მაისს, პერსონალურ მონაცემთა დაცვის ინსპექტორი თამარ ქალდანი და მისი მოადგილე ნიკოლოზ ბრეგავძე კამპანია „ეს შენ გეხებას“ წევრებს შეხვდნენ. საუბრის თემა იყო არასამთავრობო ორგანიზაციების მიერ მომზადებული საკანონმდებლო ცვლილებების პროექტი. ინსპექტორის აპარატის წარმომადგენლებმა დეტალურად შეისწავლეს არასამთავრობო ორგანიზაციების მიერ მომზადებული პროექტი და აღნიშნულზე საკუთარი მოსაზრებები კამპანიის წევრებს შეხვედრაზე გააცნეს.
„ჩვენ დეტალურად გავეცანით კამპანიის მიერ შემოთავაზებულ ვერსიებსა და მათთან ერთად განვიხილეთ სხვადასხვა საკითხი, მათ შორის, როგორ არის აღქმული ინსპექტორის როლი და ხომ არ მოხდება გარკეული გადაფარვები საპარლამენტო კონტროლის მექანიზმებთან“- განაცხადა თამარ ქალდანმა.
ინსპექტორმა ისაუბრა საკონსტიტუციო სასამართლოს გადაწყვეტილებაზე და აღნიშნა, რომ საკონსტიტუციო სასამართლომ მიიღო ძალიან მნიშვნელოვანი გადაწყვეტილება ფარულ საგამოძიებო მოქმედებებთან და მასზე ზედამხდველობასთან დაკავშირებით.
„ჩვენი მიზანი ყოველთვის იყო პირადი ცხოვრების უფრო მყარი გარანტიების შექმნა და აქედან გამომდინარე, როგორც ადრე ვიყავით ჩართულები კანონშემოქმედებით საქმიანობაში, ახლაც ვაპირებთ ნებისმიერ დაინტერესებულ ჯგუფთან შევაჯეროთ როგორც პოზიციები, ისე ერთიანი ხედვები და დეტალებში განვიხილოთ საზედამხედველო ორგანოს ფუნქციები“ - აღნიშნა ინსპექტორმა.