ადამიანის უფლებათა დაცვის საერთაშორისო დღე
2015-12-10 12:18:34
1948 წლის 10 დეკემბერს გაეროს გენერალურმა ასამბლეამ ადამიანის უფლებათა საყოველთაო დეკლარაცია მიიღო. მას შემდეგ ყოველწლიურად ადამიანის უფლებათა დღე 10 დეკემბერს აღინიშნება. მსოფლიო ისტორიაში დეკლარაციით პირველად განისაზღვრა ადამიანის ძირითადი სამოქალაქო, პოლიტიკური, ეკონომიკური, სოციალური და კულტურული უფლებები. მიუხედავად იმისა, რომ დეკლარაცია სარეკომენდაციო ხასიათისაა, იგი საფუძვლად დაედო ადამიანის უფლებათა დაცვის შესახებ 60-მდე დოკუმენტის შემუშავებას, რომელიც ერთობლიობაში ადამიანის უფლებათა საერთაშორისო სტანდარტებს ქმნიან.
საქართველოში ბოლო რამდენიმე წლის განმავლობაში ადამიანის უფლებათა დაცვის მხრივ არაერთი პოზიტიური ნაბიჯი გადაიდგა. განსაკუთრებით გვსურს ხაზი გავუსვათ პერსონალურ მონაცემთა დაცვის მარეგულირებელი ეროვნული საკანონმდებლო ჩარჩოს შემუშავებას, რომლითაც საქართველომ იკისრა ვალდებულება უზრუნველყოს თითოეული ინდივიდის პირადი ცხოვრების ხელშეუხებლობა და დაიცვას მათი პერსონალური მონაცემები. აღნიშნული ვალდებულება ასევე ასახულია ევროკავშირთან ასოცირების შეთანხმების დოკუმენტსა და ვიზა ლიბერალიზაციის სამოქმედო გეგმაში. ამ სფეროში მიღწეული პროგრესის მიუხედავად, პირადი ცხოვრების პატივისცემის უფლების რეალიზება კვლავ გამოწვევად რჩება.
პირადი ცხოვრების პატივისცემის უფლების უზრუნველსაყოფად თანაბრად მნიშვნელოვანია როგორც სახელმწიფო სტრუქტურების, ისე კერძო სექტორისა და სამოქალაქო საზოგადოების აქტიური ჩართულობა. პერსონალურ მონაცემთა დაცვის ინსპექტორის აპარატი შექმნის დღიდან რეგულარულად თანამშრომლობს ზემოაღნიშნულ ორგანოებსა თუ პირებთან, რათა საქართველოში, ერთობლივი ძალებით, დაცულ იქნას მოქალაქეთა უფლებები, დაინერგოს პირადი ცხოვრების დაცვის საერთაშორისო სტანდარტები და გაიზარდოს საზოგადოების ცნობიერება.